Lakhimpur News । লখিমপুৰ জিলাৰ কণানদী অঞ্চলত সংঘটিত হোৱা এক লজ্জাজনক আৰু চাঞ্চল্যকৰ ঘটনাই ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰিছে। অভিযোগ অনুসৰি, স্বামীৰ সন্মুখতে এগৰাকী মহিলাক ৰাজপথত অপদস্থ কৰাৰ লগতে শাৰীৰিকভাৱে আক্ৰমণ চলোৱা হয়।
প্ৰাপ্ত তথ্য অনুসৰি, কণানদী তিনিআলিত লক্ষ্যজিৎ বৰা আৰু তেওঁৰ পত্নীয়ে এখন ফাষ্টফুডৰ দোকান চলাই জীৱিকা নিৰ্বাহ কৰি আহিছিল। দুয়ো বেংগালুৰুত শিক্ষকতা কৰি থকাৰ পিছত নিজ গাঁৱলৈ উভতি আহি ব্যৱসায় আৰম্ভ কৰিছিল বুলি জানিব পৰা গৈছে। শেহতীয়াকৈ দোকানখন নতুনকৈ সংস্কাৰ বা নিৰ্মাণ কৰাৰ সময়তে এই সংঘাতৰ সূচনা হয়।
ভুক্তভোগী পৰিয়ালৰ অভিযোগ অনুসৰি, হৰকান্ত চাৰিঙীয়াৰ নেতৃত্বত একাংশ পুৰুষ আৰু মহিলাই দোকানখনত আক্ৰমণ চলাই ভাঙি লণ্ডভণ্ড কৰে। ইয়াৰ লগতে লক্ষ্যজিৎ বৰাৰ পত্নী পূজাশ্ৰী গগৈৰ ওপৰত শাৰীৰিক আক্ৰমণ চলোৱা হয় আৰু ৰাজপথতে তেওঁক অপদস্থ কৰা হয় বুলি অভিযোগ উত্থাপিত হৈছে।
অভিযোগত তুলসী পায়েং, পাপলু পায়েং, টুটু কামান আৰু জেৰিফা কামানৰ নামো উল্লেখ কৰা হৈছে। আক্ৰমণকাৰীসকলৰ হাতত চোকা অস্ত্ৰ আছিল বুলিও অভিযোগ কৰা হৈছে।
ঘটনাটো সোমবাৰে দিনৰ ভাগত সংঘটিত হোৱা বুলি জানিব পৰা গৈছে। ইফালে, ঘটনাস্থলীত উপস্থিত থকা কিছুমান লোকে ভুক্তভোগীক সহায় কৰাৰ পৰিৱৰ্তে সমগ্ৰ ঘটনাৰ ভিডিঅ’ মোবাইল ফোনত ৰেকৰ্ড কৰে। পিছত সেই ভিডিঅ’ সামাজিক মাধ্যমত প্ৰচাৰ পোৱাত ঘটনাটোক লৈ ব্যাপক ক্ষোভৰ সৃষ্টি হৈছে।
উল্লেখ্য যে, ঘটনাটোৰ সৈতে জড়িত অভিযোগসমূহ এতিয়াও আৰক্ষীৰ তদন্তৰ অধীনত আছে। অভিযুক্তসকলৰ বিৰুদ্ধে উত্থাপিত অভিযোগসমূহৰ সত্যতা স্বাধীনভাৱে নিশ্চিত হোৱা নাই।
ইফালে, স্থানীয় ৰাইজ আৰু বিভিন্ন মহলে ঘটনাটোৰ নিৰপেক্ষ তদন্ত, দোষী সাব্যস্ত হ’লে কঠোৰ শাস্তি আৰু মহিলাগৰাকীৰ বাবে ন্যায় নিশ্চিত কৰাৰ দাবী জনাইছে। ঘটনাই মহিলাৰ সুৰক্ষা, আইন-শৃংখলা আৰু সামাজিক দায়িত্ববোধক লৈ পুনৰ গুৰুতৰ প্ৰশ্ন উত্থাপন কৰিছে।
