গুৱাহাটী, ১৩ জুনঃ মহানগৰীৰ লখিমী নগৰস্থিত গুণ এপাৰ্টমেণ্টত শনিবাৰে এক পাৰিবাৰিক বিবাদক কেন্দ্ৰ কৰি তীব্ৰ উত্তেজনাৰ সৃষ্টি হয়। পত্নী আৰু কন্যাক আক্ৰমণ কৰাৰ অভিযোগ উত্থাপন হৈছে ভাৰত চৰকাৰৰ বৈদেশিক পৰিক্ৰমা বিভাগৰ জ্যেষ্ঠ বিষয়া ছাহিল ৰফিকৰ বিৰুদ্ধে। ঘটনাক কেন্দ্ৰ কৰি উভয় পক্ষই একে-অপৰৰ বিৰুদ্ধে গুৰুতৰ অভিযোগ উত্থাপন কৰাত বিষয়টো অধিক জটিল ৰূপ ধাৰণ কৰিছে।
অভিযোগ অনুসৰি, ছাহিল ৰফিকে প্ৰথমা পত্নী আৰু কন্যাক দীৰ্ঘদিন ধৰি ভৰণ-পোষণ নিদিয়াকৈ দ্বিতীয় পত্নীৰ সৈতে গুণ এপাৰ্টমেণ্টত বিলাসী জীৱন অতিবাহিত কৰি আছে। প্ৰথমা পত্নীয়ে অভিযোগ কৰে যে, স্বামীৰ কথিত অনৈতিক কাৰ্যকলাপ আৰু দ্বিতীয় বিবাহৰ বিষয় উন্মোচন কৰাৰ বাবেই তেওঁলোক আক্ৰমণৰ সন্মুখীন হয়। লগতে বহু বিদেশী মহিলাৰ সৈতে ছাহিল ৰফিকৰ সম্পৰ্ক থকাৰ অভিযোগো উত্থাপন কৰিছে পৰিয়ালটোৱে।
আনহাতে, এই সকলো অভিযোগ দৃঢ়ভাৱে অস্বীকাৰ কৰিছে ছাহিল ৰফিকে। সংবাদ মাধ্যমৰ আগত তেওঁ দাবী কৰে যে, ২০১৪ চনতে আদালতৰ জৰিয়তে প্ৰথমা পত্নীৰ সৈতে বিবাহ বিচ্ছেদ সম্পন্ন হৈছিল। আদালতৰ নিৰ্দেশনা অনুসৰি তেওঁ নিয়মীয়াকৈ প্ৰতিমাহে ৩৫ হাজাৰ টকাকৈ ভৰণ-পোষণ দি আহিছে বুলিও মন্তব্য কৰে। আনকি কন্যাৰ বয়স ১৮ বছৰ অতিক্ৰম কৰাৰ পিছতো আৰ্থিক সহায় আগবঢ়াই আহিছে বুলি তেওঁ দাবী কৰে।
ছাহিল ৰফিকৰ অভিযোগ অনুসৰি, শনিবাৰে পুৱা প্ৰথমা পত্নী, কন্যা আৰু পত্নীৰ এগৰাকী আত্মীয়ই বলপূৰ্বকভাৱে তেওঁৰ বাসগৃহত প্ৰৱেশ কৰিছিল। ঘৰত সোমাই তেওঁলোকেই প্ৰথমে আক্ৰমণ চলোৱাৰ লগতে তেওঁৰ কাপোৰ-চোপোৰ ফালি পেলায় বুলিও অভিযোগ উত্থাপন কৰে বিষয়াজনে।
ইতিমধ্যে ঘটনাক লৈ দিছপুৰ থানাত এজাহাৰ দাখিল কৰা হৈছে। ছাহিল ৰফিকে তিনিগৰাকী মহিলাৰ বিৰুদ্ধে হত্যাৰ চেষ্টা চলোৱাৰ অভিযোগ উত্থাপন কৰিছে। আনহাতে, প্ৰথমা পত্নী আৰু কন্যাইও আক্ৰমণৰ অভিযোগ উত্থাপন কৰিছে।
ঘটনাটোক কেন্দ্ৰ কৰি মহানগৰীত তীব্ৰ চাঞ্চল্যৰ সৃষ্টি হৈছে। আৰক্ষীয়ে উভয় পক্ষৰ অভিযোগৰ ভিত্তিত তদন্ত আৰম্ভ কৰিছে। অৱশ্যে অভিযোগসমূহৰ সত্যতা এতিয়াও আৰক্ষীৰ তদন্ত বা আদালতৰ জৰিয়তে নিশ্চিত হোৱা নাই।
