Himanta Biswa Sarma গণেশগুৰি উৰণসেতুত জুবিন গাৰ্গৰ পেইণ্টিং বিতৰ্কঃ প্ৰথমবাৰ মুখ খুলিলে মুখ্যমন্ত্ৰী হিমন্ত বিশ্ব শৰ্মাই
গণেশগুৰি উৰণসেতুত অংকন কৰা শিল্পী জুবিন গাৰ্গৰ ছবি মচি পেলোৱাৰ ঘটনাক লৈ সৃষ্টি হোৱা বিতৰ্কৰ মাজতে প্ৰথমবাৰৰ বাবে নিজৰ স্থিতি স্পষ্ট কৰিলে হিমন্ত বিশ্ব শৰ্মাই।
শুকুৰবাৰে অনুষ্ঠিত এক সংবাদমেলত মুখ্যমন্ত্ৰীয়ে কয় যে মচি পেলোৱা ছবিখন জুবিন গাৰ্গৰ সৈতে স্পষ্টভাৱে মিল নাছিল। তেওঁৰ দাবী অনুসৰি, ৰংৰ কাম কৰা দুজন মিস্ত্ৰীয়ে আৰক্ষীৰ ওচৰত দিয়া বয়ানত কৈছে যে ছবিখন জুবিন গাৰ্গৰ দৰে একেবাৰেই দেখা নাযাইছিল। মুখ্যমন্ত্ৰীয়ে লগতে কয় যে উক্ত দুয়োজন মিস্ত্ৰী নিজেই জুবিন গাৰ্গৰ অনুৰাগী, আৰু তেওঁলোক অসমীয়াও।
এই প্ৰসংগত মুখ্যমন্ত্ৰীয়ে অভিযোগ তোলে যে উৰণসেতুত ছবি অংকন কৰা গোটটো SFIৰ সৈতে জড়িত। তেওঁৰ ভাষ্য মতে, এই গোটে প্ৰথমে উৰণসেতু নিৰ্মাণৰ বিৰোধিতা কৰিছিল আৰু পিছত উৰণসেতুত ছবি আঁকি প্ৰচাৰ লাভৰ চেষ্টা কৰিছে। তেওঁ স্পষ্টভাৱে ঘোষণা কৰে যে আগন্তুক সময়ত SFI-ৰ দ্বাৰা চৰকাৰী উৰণসেতুত কোনো ধৰণৰ ছবি অংকন কৰিবলৈ দিয়া নহ’ব।
মুখ্যমন্ত্ৰীয়ে কয় যে ৰাজ্যৰ সকলো জিলা আয়ুক্ত (DC) আৰু আৰক্ষী অধীক্ষক (SP)-ক এই বিষয়ে নিৰ্দেশ দিয়া হৈছে। তেওঁৰ মতে, চৰকাৰী অনুমতি অবিহনে SFI-এ উৰণসেতুত ছবি অংকন কৰিলে আইনী ব্যৱস্থা গ্ৰহণ কৰা হ’ব।
বক্তব্যত তেওঁ বিদেশী বিপ্লৱীৰ ছবি অংকনৰো সমালোচনা কৰি কয় যে অসমত বিপ্লৱীৰ ছবি অংকন কৰিব বিচাৰিলে স্থানীয় ইতিহাস আৰু ব্যক্তিত্বক অগ্ৰাধিকাৰ দিয়া উচিত। লগতে তেওঁ মন্তব্য কৰে যে জুবিন গাৰ্গৰ ছবি অংকনৰ ক্ষেত্ৰতো এটা সুসংগঠিত থীম আৰু উপযুক্ত স্থান নিৰ্বাচন কৰা উচিত।
মুখ্যমন্ত্ৰীয়ে কয় যে গণেশগুৰি উৰণসেতুৰ স্থানটো ঐতিহাসিকভাৱে সংবেদনশীল, কিয়নো সেই অঞ্চলটো গণেশগুৰি বোমা বিস্ফোৰণৰ স্মৃতিৰ সৈতে জড়িত। তেওঁৰ মতে, সেই স্থানত সন্ত্ৰাসবাদবিৰোধী বাৰ্তা বা বিস্ফোৰণত নিহতসকলৰ স্মৃতিচিহ্নমূলক শিল্পকৰ্ম অংকন কৰাটোহে অধিক উপযুক্ত হ’লহেঁতেন।
ইফালে, জুবিন গাৰ্গৰ সৈতে চৰকাৰৰ কোনো মতবিৰোধ নাই বুলি স্পষ্ট কৰি মুখ্যমন্ত্ৰীয়ে কয়, চৰকাৰে সদায় শিল্পীগৰাকীক সন্মান জনাই আহিছে। তেওঁ ৰসিকতাৰে কয় যে প্ৰয়োজন হ’লে জুবিন গাৰ্গৰ ছবি তেওঁ নিজেই গৈ আঁকিব আৰু নিজ হাতে ৰং দিব।
মুখ্যমন্ত্ৰীৰ এই মন্তব্যৰ পিছত গণেশগুৰি উৰণসেতুৰ পেইণ্টিং বিতৰ্কই নতুন ৰাজনৈতিক আৰু সামাজিক চৰ্চাৰ জন্ম দিছে।
