বিলাসীপাৰাৰ বেলতলী বজাৰত ব্যৱসায়ীক অপহৰণ সদৃশভাৱে ধৰি ধনদাবীৰ অভিযোগ, ৬ জনৰ বিৰুদ্ধে এজাহাৰ
ধুবুৰী জিলাৰ বিলাসীপাৰাৰ বেলতলী বজাৰত এজন ব্যৱসায়ীক বলপূৰ্বকভাৱে ধৰি ধনদাবী কৰাৰ গুৰুতৰ অভিযোগ উত্থাপিত হৈছে। ঘটনাক কেন্দ্ৰ কৰি ভুক্তভোগী ব্যৱসায়ীগৰাকীয়ে বিলাসীপাৰা আৰক্ষী থানাত ৬ জনৰ বিৰুদ্ধে এজাহাৰ দাখিল কৰিছে।
অভিযোগ অনুসৰি, যোৱা ৰবিবাৰে বেলতলী চাৰিআলী বজাৰত থকা এখন চাহ দোকানৰ পৰা জেলহক আলী নামৰ ব্যৱসায়ীগৰাকীক চক্ৰটোৰ এজন সদস্যই মাতি লৈ যায়। পিছত বেলতলীৰ বিকি নামৰ এজনৰ ঘৰৰ সন্মুখত প্ৰায় ১৫ৰ পৰা ২০ জনীয়া এদল লোকে তেওঁক আৱদ্ধ কৰি প্ৰায় ৩০ লাখ টকা ধন দাবী কৰে বুলি এজাহাৰত উল্লেখ কৰা হৈছে।
ভুক্তভোগীৰ অভিযোগ অনুসৰি, পৰৱৰ্তী সময়ত দাবীৰ পৰিমাণ হ্ৰাস কৰি প্ৰথমে ৫ লাখ টকা আৰু শেষত ১ লাখ ৫০ হাজাৰ টকা আদায় লোৱা হয়। লগতে, ধন লোৱাৰ পিছত তেওঁক শপতনামাত জোৰপূৰ্বক চহী কৰিবলৈ বাধ্য কৰোৱা বুলিও অভিযোগ উত্থাপন কৰা হৈছে।
এই ঘটনাৰ পিছতে ভুক্তভোগীগৰাকীয়ে আলী হুছেইন, ফুলবৰ, বিকি, জন, মিজানুৰ ৰহমানকে ধৰি মুঠ ৬ জনৰ বিৰুদ্ধে বিলাসীপাৰা আৰক্ষী থানাত ধনদাবী আৰু ভয়-ভাবুকিৰ অভিযোগেৰে এজাহাৰ দাখিল কৰে।
স্থানীয় লোকৰ একাংশই দাবী কৰা অনুসৰি, অভিযুক্ত চক্ৰটোৱে দীৰ্ঘদিন ধৰি বিলাসীপাৰাৰ বিভিন্ন প্ৰান্তত সন্ত্ৰাসৰ পৰিৱেশ সৃষ্টি কৰি আহিছে। অৱশ্যে এই অভিযোগসমূহৰ স্বাধীনভাৱে সত্যতা এতিয়াও নিশ্চিত হোৱা নাই।
ইফালে, ঘটনাৰ তদন্ত আৰম্ভ কৰিছে বিলাসীপাৰা আৰক্ষীয়ে। এজাহাৰত উত্থাপিত অভিযোগৰ ভিত্তিত আৰক্ষীয়ে কি ব্যৱস্থা গ্ৰহণ কৰে, সেয়াই এতিয়া লক্ষ্যণীয় হ’ব।
