গুৱাহাটী, ১৮ জুন — jayanta bhagawati actor । অনাতাঁৰ নাট, ধাৰাবাহিক আৰু চলচ্চিত্ৰত শক্তিশালী অভিনয়ৰে অসমীয়া দৰ্শকৰ হৃদয় জয় কৰা ‘নামঘৰীয়া’ খ্যাত বলিষ্ঠ অভিনেতা জয়ন্ত ভাগৱতীৰ জীৱনত বৰ্তমানে দুখৰ অন্ধকাৰপথ। একেদৰে জীয়াই আছে দুখ, ৰোগ, অসহায়তা আৰু নিৰ্মম বাস্তৱতা।
দূৰদৰ্শনত অতুলানন্দ গোস্বামীৰ কলমত জন্ম লোৱা আৰু জনপ্ৰিয়তা লাভ কৰা “নামঘৰীয়া” ধাৰাবাহিকৰ মুখ্য চৰিত্ৰটোৱে বহুসময়ত লোকক উৎসাহ, মনোৰঞ্জন আৰু চিন্তা দিব পাৰিছিল। কিন্তু সেই নামভূমিকাৰ অভিনেতা জয়ন্ত ভাগৱতীৰ বাস্তৱ জীৱন আজি নিজেই কৰুণ কাহিনীৰ দৰে। পক্ষাঘাতগ্ৰস্ত পত্নী আৰু বিশেষভাৱে সক্ষম কন্যা, দুয়োকে ঘৰত এৰি, স্বয়ং তেওঁ চিকিৎসাধীন হৈ আছে গুৱাহাটী চিকিৎসা মহাবিদ্যালয় (GMCH)-ত।
চাকৰিসূত্ৰে একমাত্ৰ পুত্ৰজন পিতৃ-মাতৃৰ পৰা বহু দূৰত। ঘৰৰ ভিতৰত অসহায়তা, বাইৰলৈ ওলালেই অৰ্থকষ্ট—এইবোৰৰ মাজতেই এগৰাকী সুদক্ষ অভিনেতাৰ চকুলো আজিৰ GMCH ৰ বিৰল দৃশ্য হ’ল।
জয়ন্ত ভাগৱতীৰ দুখৰ খবৰ পোৱাৰ পিছতে আজি GMCH লৈ গৈ তেওঁক পৰিদৰ্শন কৰে মুখ্যমন্ত্ৰী হিমন্ত বিশ্ব শৰ্মাই। সামাজিক মাধ্যমত মুখ্যমন্ত্ৰীয়ে লেখে:
“অসমীয়া অনাতাঁৰ নাট, ধাৰাবাহিক আৰু চলচ্চিত্ৰৰ বৰেণ্য অভিনেতা শ্ৰদ্ধাৰ শ্ৰীজয়ন্ত ভাগৱতী ডাঙৰীয়া সম্প্ৰতি জি এম চি এইচত চিকিৎসাধীন হৈ আছে৷ শক্তিশালী অভিনয় শৈলীৰে অভিনয়প্ৰেমী শ্ৰোতা-দৰ্শকৰ মন-মগজুত এক সুকীয়া আসন দখল কৰা ভাগৱতী ডাঙৰীয়াৰ শাৰীৰিক অসুস্থতাৰ খবৰ শুনি আজি চিকিৎসালয়খনত উপস্থিত হৈ স্বাস্থ্যৰ বুজ লওঁ৷ তেখেতৰ দ্ৰুত আৰোগ্য কামনা কৰিলোঁ৷ চিকিৎসালয় কৰ্তৃপক্ষক তেখেতৰ পৰিচৰ্যাত কোনো সুৰুঙা নাৰাখিবলৈ নিৰ্দেশনা প্ৰদান কৰোঁ।”
অসমীয়াৰ সাংস্কৃতিক ভাণ্ডাৰৰ উজ্জ্বল এক নক্ষত্ৰ আজিৰ দিনত যেতিয়া আৰ্থিক-শাৰীৰিক দুখত জৰ্জৰিত, তেতিয়া কেৱল চৰকাৰে নহয়, সংস্কৃতিপ্ৰেমী সকলোৰে সহানুভূতি আৰু সহায় একান্ত প্ৰয়োজন। জয়ন্ত ভাগৱতীৰ দুখত অসমৰ সমাজে সহানুভূতিৰে দাঁড়াই, সঁচাকৈ এক উৎকৃষ্ট সাংস্কৃতিক চেতনার পৰিচায়ক হ’ব।
