S N D Beauty Parlour । গুৱাহাটীৰ জু-ৰোডস্থিত এটা বিউটী পাৰ্লাৰত আৰক্ষীয়ে চলোৱা এক বিশেষ অভিযানত ৯ গৰাকী যুৱতীক আটক কৰাৰ লগতে বহু আপত্তিজনক সামগ্ৰী উদ্ধাৰ কৰাৰ ঘটনা পোহৰলৈ আহিছে। ঘটনাই মহানগৰীত ব্যাপক চাঞ্চল্যৰ সৃষ্টি কৰিছে।
জানিব পৰা মতে, গোপন সূত্ৰৰ পৰা লাভ কৰা তথ্যৰ ভিত্তিত গীতানগৰ আৰক্ষী আৰু স্পেচিয়েল অপাৰেচন গ্ৰুপ (SOG)-এ জু-ৰোডস্থিত SND পাৰ্লাৰত যৌথভাৱে অভিযান চলায়। অভিযানকালত পাৰ্লাৰখনত অসামাজিক আৰু অনৈতিক কাৰ্যকলাপ চলি থকাৰ সন্দেহত আৰক্ষীয়ে ৯ গৰাকী যুৱতীক আটক কৰে।
আৰক্ষীৰ সূত্ৰই জনোৱা মতে, আটক কৰা যুৱতীসকলৰ ভিতৰত কেইবাগৰাকীও অনৈতিক কাৰ্যকলাপৰ সৈতে জড়িত থকাৰ সন্দেহ কৰা হৈছে। অভিযানৰ সময়ত পাৰ্লাৰখনৰ পৰা বহু আপত্তিজনক সামগ্ৰীও জব্দ কৰা হয়।
ইয়াৰ উপৰিও, আৰক্ষীয়ে এই চক্ৰটোৰ মূল পৰিচালক বা ‘মাষ্টাৰমাইণ্ড’ বুলি সন্দেহ কৰা এগৰাকী যুৱতীক গ্ৰেপ্তাৰ কৰাৰ লগতে অনিল নামৰ এজন ব্যক্তিকো আটক কৰে। তদন্তকাৰী বিষয়াসকলে অভিযোগ কৰা মতে, পাৰ্লাৰখনৰ আড়ত দীৰ্ঘদিন ধৰি অবৈধ আৰু অসামাজিক কাৰ্যকলাপ চলি আহিছিল।
ঘটনাৰ সৈতে জড়িত অন্যান্য ব্যক্তি আছে নেকি সেই দিশটোও আৰক্ষীয়ে তদন্ত কৰি আছে। আটক কৰা সকলোকে অধিক সোধ-পোচৰ বাবে আৰক্ষী হেফাজতলৈ নিয়া হৈছে।
ইফালে, মহানগৰীৰ বিভিন্ন অঞ্চলত এনে ধৰণৰ অবৈধ কাৰ্যকলাপৰ বিৰুদ্ধে আৰক্ষীয়ে আগন্তুক দিনতো কঠোৰ অভিযান অব্যাহত ৰাখিব বুলি জানিব পৰা গৈছে।
উল্লেখ্য যে, আটক ব্যক্তিসকলৰ বিৰুদ্ধে উত্থাপিত অভিযোগসমূহ এতিয়াও তদন্তাধীন।
