পাণবাৰী ষ্টেচন এৰাৰ পিছতে ব্ৰেক ফেইল! কাম নকৰিলে জৰুৰীকালীন ব্ৰেকো, ডিগাৰু ৰে’ল দুৰ্ঘটনাৰ ভয়ংকৰ তথ্য পোহৰলৈ
মহানগৰীৰ পাৰ্শ্বৱৰ্তী ডিগাৰুত সংঘটিত ৰে’ল দুৰ্ঘটনাক লৈ পোহৰলৈ আহিছে এটাৰ পিছত আনটো গুৰুত্বপূৰ্ণ তথ্য। পাণবাৰী ষ্টেচন এৰাৰ পিছতে ব্ৰেক ফেইল হৈছিল ছাইৰাং এক্সপ্ৰেছৰ। আনকি কাম কৰা নাছিল ৰে’লখনৰ জৰুৰীকালীন ব্ৰেকেও। ফলত নিয়ন্ত্ৰণ হেৰুৱাই লাইনচ্যুত হয় ৰে’লখনৰ ইঞ্জিনসহ সাতটাকৈ ডবা। এই ঘটনাত কেইবাজনো যাত্ৰী আহত হোৱা বুলি জানিব পৰা গৈছে।

আনহাতে, ভয়ংকৰ বিপদৰ পৰা কথমপি ৰক্ষা পৰিল ছাইৰাং এক্সপ্ৰেছৰ লগতে শতাব্দী এক্সপ্ৰেছৰ যাত্ৰীসকল। কিয়নো ছাইৰাং এক্সপ্ৰেছ গৈ থকা একেটা ট্ৰেকেৰেই আহি আছিল শতাব্দী এক্সপ্ৰেছ।
জানিব পৰা মতে, ডিগাৰু ৰে’ল ষ্টেচনৰ ছিগনেল ব্যৱস্থাও বিকল হৈ আছিল। এনে পৰিস্থিতিত ছাইৰাং এক্সপ্ৰেছৰ চালকে তৎক্ষণাৎ ষ্টেচন কৰ্তৃপক্ষৰ সৈতে যোগাযোগ কৰে। সেই সময়তে ৰে’ল কৰ্তৃপক্ষই একেটা ট্ৰেকতে শতাব্দী এক্সপ্ৰেছ আহি থকাৰ কথা চালকজনক অৱগত কৰে।

পৰিস্থিতিৰ গুৰুত্ব উপলব্ধি কৰি ছাইৰাং এক্সপ্ৰেছখন লুপ লাইনেৰে সুমুৱাই নিয়াৰ পৰামৰ্শ দিয়ে ৰে’ল কৰ্তৃপক্ষই। ইয়াৰ পিছতে চালকজনে লুপ লাইনত থকা শিলৰ দ’মত খুন্দা মাৰি ৰে’লখনৰ গতিবেগ নিয়ন্ত্ৰণৰ চেষ্টা চলায়। অৱশেষত লাইনচ্যুত হয় ৰে’লখনৰ সাতটাকৈ ডবা।
চালক আৰু ৰে’ল কৰ্তৃপক্ষৰ তৎকালীন পদক্ষেপৰ ফলতেই একেটা ট্ৰেকত আহি থকা দুখনকৈ ৰে’লৰ যাত্ৰীসকল সম্ভাব্য ভয়ংকৰ বিপদৰ পৰা ৰক্ষা পৰে বুলি জানিব পৰা গৈছে।

উল্লেখ্য যে আজি পুৱা ডিগাৰু ৰে’ল ষ্টেচনৰ সমীপত সংঘটিত হয় এই ৰে’ল দুৰ্ঘটনা। দুৰ্ঘটনাত ছাইৰাং এক্সপ্ৰেছৰ ইঞ্জিনসহ সাতটাকৈ ডবা লাইনচ্যুত হয়। ঘটনাৰ পিছতে উদ্ধাৰকাৰী দল আৰু ৰে’ল বিভাগৰ কৰ্মচাৰী ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। দুৰ্ঘটনাৰ প্ৰকৃত কাৰণ আৰু ক্ষয়-ক্ষতিৰ সন্দৰ্ভত ৰে’ল বিভাগৰ তদন্তৰ পিছত অধিক তথ্য পোহৰলৈ অহাৰ সম্ভাৱনা আছে।
সম্পাদনাৰ টোকা: প্ৰকাশৰ পূৰ্বে ব্ৰেক বিকল হোৱা, ছিগনেল বিকল থকা আৰু লুপ লাইনৰ শিলৰ দ’মত খুন্দা মৰাৰ তথ্যসমূহ ৰে’ল বিভাগৰ আনুষ্ঠানিক বক্তব্যৰে নিশ্চিত কৰি ল’ব।
