Narendra Modi । সমগ্ৰ বিশ্বৰ লগতে দেশজুৰি আজি আন্তঃৰাষ্ট্ৰীয় যোগ দিৱস উৎসাহ-উদ্দীপনাৰ মাজেৰে পালন কৰা হয়। যোগাভ্যাস, ধ্যান আৰু সুস্থ জীৱনশৈলীৰ প্ৰতি জনসাধাৰণক সচেতন কৰি তোলাৰ উদ্দেশ্যে প্ৰতি বছৰে ২১ জুনত এই দিৱস পালন কৰা হয়।
ভাৰতৰ প্ৰাচীন ঐতিহ্য আৰু আধ্যাত্মিক অনুশীলনৰ অন্যতম অংগ যোগ। সংস্কৃত ভাষাৰ ‘যোগ’ শব্দৰ অৰ্থ হৈছে ‘সংযোগ’ বা ‘একত্ৰিত হোৱা’। দেহ, মন আৰু আত্মাৰ মাজত সমন্বয় স্থাপন কৰাই যোগৰ মূল উদ্দেশ্য।
এইবাৰ কলকাতাৰ ৰেড ৰোডত এক বৃহৎ আয়োজনৰ মাজেৰে আন্তঃৰাষ্ট্ৰীয় যোগ দিৱস উদযাপন কৰা হয়। অনুষ্ঠানত মুখ্য অতিথি হিচাপে উপস্থিত থাকে প্ৰধানমন্ত্ৰী নৰেন্দ্ৰ মোডী। পুৱা প্ৰায় ৬:৩০ বজাত তেওঁ যোগস্থলত উপস্থিত হৈ হাজাৰ হাজাৰ অংশগ্ৰহণকাৰীৰ সৈতে সামূহিক যোগাভ্যাসত অংশগ্ৰহণ কৰে।
পশ্চিমবংগৰ পৰম্পৰাগত ছৌ নৃত্য আৰু ঢাকৰ মাতেৰে প্ৰধানমন্ত্ৰীগৰাকীক উষ্ম আদৰণি জনোৱা হয়। যোগাসনৰ পিছত তেওঁ সমগ্ৰ অনুষ্ঠানস্থলী পৰিদৰ্শন কৰি অংশগ্ৰহণকাৰীসকলৰ সৈতে মত বিনিময় কৰে।
দেশবাসীক সম্বোধন কৰি প্ৰধানমন্ত্ৰীয়ে কয়, “আজি ২১ জুন বিশ্বৰ এক বৃহৎ উৎসৱত পৰিণত হৈছে। যোগে বিশ্বৰ সকলো লোককে একগোট কৰে।” তেওঁ গীতাৰ প্ৰসংগ উল্লেখ কৰি কয় যে যোগে জীৱনশৈলীত ভাৰসাম্য আনে আৰু নিয়মীয়া যোগাভ্যাসে শাৰীৰিক আৰু মানসিক সুস্থতা বজাই ৰখাত সহায় কৰে।
প্ৰধানমন্ত্ৰীয়ে লগতে মানসিক স্বাস্থ্যৰ ক্ষেত্ৰত যোগৰ গুৰুত্বৰ ওপৰত আলোকপাত কৰি কয় যে যোগে মানসিক চাপ হ্ৰাস কৰাৰ লগতে আত্মবিশ্বাস আৰু ইতিবাচক চিন্তাধাৰা গঢ়ি তোলাত সহায় কৰে।
তেওঁৰ ভাষণত উল্লেখ কৰা হয় যে বিশ্বৰ বহু দেশৰ লাখ লাখ লোকে আন্তঃৰাষ্ট্ৰীয় যোগ দিৱসত সক্ৰিয়ভাৱে অংশগ্ৰহণ কৰিছে, যিয়ে যোগৰ বিশ্বব্যাপী জনপ্ৰিয়তাক প্ৰতিফলিত কৰিছে।
আন্তঃৰাষ্ট্ৰীয় যোগ দিৱসৰ এই ব্যাপক উদযাপনে সুস্থ জীৱনশৈলী, স্বাস্থ্য সচেতনতা আৰু মানসিক সুস্থতাৰ প্ৰতি নতুনকৈ জনসাধাৰণৰ আগ্ৰহ বৃদ্ধি কৰিছে। বিশেষকৈ পশ্চিমবংগত এই বৃহৎ আয়োজনক কেন্দ্ৰ কৰি এক উৎসৱমুখৰ পৰিৱেশৰ সৃষ্টি হোৱা দেখা যায়।
